Ministri i Administrimit të Pushtetit Lokal, Elbert Krasniqi, ka thënë se gjithçka tjetër përveç udhëzimit administrativ për zgjedhjet në veri është kërkesë e Beogradit.
Në një konferencë për media, Krasniqi ka thënë se ky udhëzim i hap rrugë ndërprerjes së mandatit të kryetarëve të komunave, vetëm nëse pas peticionit për largimin e tyre deklarohen së paku 50 për qind e trupës votuese të asaj komune.
“Udhëzimi administrativ është proces demokratik dhe gjithçka tjetër nuk është kërkesë e qytetarëve atje, por janë kërkesa të Beogradit. Ato nuk janë kërkesa në të mirë të qytetarëve. Udhëzimi i hap rrugë ndërprerjes së mandatit të kryetarëve të komunave, vetëm nëse pas peticionit për largimin e tyre deklarohen së paku 50 për qind e trupës votuese të asaj komune”, ka thënë Krasniqi.
Sipas tij, Beogradi e ka bërë pengimin e serbëve që të marrin pjesë në zgjedhje.
“Largimi i tyre mund bëhet përmes formës që është shumë demokratike. Kush mund të garantojë që serbët do të marrin pjesë në zgjedhje nëse kryetarët japin dorëheqje? Për këtë arsye kemi zgjedhur këtë formë”, ka vijuar ai.
Ndryshe, të martën, i dërguari special i ShBA-së për Ballkanin Perëndimor, Gabriel Escobar ka deklaruar se “dorëheqjet janë rruga më e shpejtë dhe më e lehtë” dhe se “peticioni si nismë s’është provuar ndonjëherë”.