Kryeministri i Kosovës, Albin Kurti, të mërkurën ka zhvilluar një takim me ambasadorin e Francës në Kosovë, Olivier Guerot.
Siç ka njoftuar Zyra e Kryeministrit, Kurti dhe ambasadori Guerot kanë diskutuar për takimin e nesërm të nivelit të lartë në Bruksel, për pritjet dhe rëndësinë e zbatimit të plotë, të shpejtë dhe pa kushte të Marrëveshjes Bazike dhe Aneksit të saj.
“Në takim u diskutua edhe për marrëdhëniet bilaterale, çështjet aktuale dhe për takimin e nesërm të nivelit të lartë në Bruksel, pritjet nga ai takim dhe për rëndësinë e zbatimit të plotë, të shpejtë dhe pa kushte të Marrëveshjes Bazike dhe Aneksit të saj”, thuhet në njoftimin e Kryeministrisë.
Ndërkaq, ambasadori Guerot e ka uruar kryeministrin Kurti për kandidaturën e suksesshme për organizimin e Lojërave Mesdhetare 2030.
Po ashtu, ambasadori Guerot i ka ofruar ndihmën dhe përvojën e Francës nga organizimi i këtyre lojërave në vitin 1993.
Siç thuhet nga Zyra e Kryeministrit, Kurti e ka mirëpritur gatishmërinë e Francës për mbështetje dhe ka thënë se Kosova synon të mësojë nga Franca dhe të bashkëpunojë për organizim sa më të mirë.
Takimi i 14 shtatorit do të jetë i teti mes Kurtit dhe presidentit serb, Aleksandër Vuçiq.
Në shtatë takimet e kaluara, ata nuk kanë nënshkruar asnjë marrëveshje, përfshirë edhe atë për normalizim në shkurt, e cila është arritur vetëm gojarisht.