Analisti Dibran Hoxha ka deklaruar se procesi i dialogut është i përmbysur dhe nuk po arrin me të gjenerojë asnjë rezultat në mes të palëve.
Kështu është shprehur ai në emisionin “Debat Plus” të RTV Dukagjinit, ku po diskutohet lidhur me takimin që zhvilluan Kurti dhe Vuçiqi në Bruksel.
“Pozicioni i Albin Kurtit ka shumë më shumë racionalitet dhe logjikë në kuptim të dialogut që po bëhet sesa pozicioni tashmë i Serbisë dhe i bashkësisë ndërkombëtare dhe BE-së në rastin konkret, sepse nëse ndjekim me radhë logjikën dhe strukturimin e dokumenteve të cilat na u paraqitën, ato tregojnë pse kjo tashmë metafora e famshme ‘Qerja para Kalit’ qëndron”, ka thënë Hoxha.
Tutje ai ka theksuar se “në radhë të parë krejt ky proces i dialogut është I përmbysur në kuptimin që nuk po mbërrin me gjeneru kurrfarë rezultati në mes palëve, pasi të dy palët për njëra-tjetrën janë problematike”.
Ndryshe, kryeministri Albin Kurti, gjatë takimit të së enjtes në Bruksel me presidentin e Serbisë, Aleksandër Vuçiq, ka thënë se ka prezantuar një udhërrëfyes të sekuencuar për zbatimin e marrëveshjes së Brukselit të 27 shkurtit, dhe të Aneksit të Zbatimit të Ohrit të 18 marsit.
Por, rundi i ri i bisedimeve për normalizimin e marrëdhënieve mes Kosovës dhe Serbisë tashmë kishte përfunduar pa ndonjë pajtim mes palëve.
Kurti para gazetarëve ka deklaruar se ka qenë i vetmi në takim që ka propozuar “një udhërrëfyes të sekuencuar” për zbatimin e Marrëveshjes Bazë.