Deputetët, si nga pozita, ashtu edhe nga opozita me 74 vota për e kanë mbështetur Projektligjin për Policinë Ushtarake në Forcat e Sigurisë së Kosovës.
Bekë Berisha, kryetar i Komisionit për Çështje të Sigurisë dhe Mbrojtjes ka thënë se miratimi i këtij Projektligji do të mundësojë avancimin e infrastrukturës ligjore për Policinë Ushtarake të Forcave të Sigurisë së Kosovës(FSK), pasi aktualisht funksionon me akte nënligjore.
Enver Dugolli nga Lëvizja Vetëvendosje ka thënë se ky mekanizëm po ndërrohet konform standardeve të vendeve mike dhe Ushtrisë së NATO-s.
Nga radhët e opozitës, Hisen Berisha, deputet i Partisë Demokratike të Kosovës(PDK) ka mbështetur këtë ligj, duke shtuar se ky ligj do ta mbështesë Policinë ushtarake të Forcës së Sigurisë në përmbushje të obligimeve. Vlera përmbajtësore e këtij ligji është në nivelin e ushtrive ndërkombëtare.
Gjithashtu, edhe Anton Quni nga Lidhja Demokratike e Kosovës (LDK) ka shtuar se pasi kemi harmonizuar qëndrimet, duhet të kemi edhe një qëndrim të përbashkët që ta miratojmë këtë Projektligj.