Presidentja e Kosovës, Vjosa Osmani në ceremoninë e varrimit të policit të vrarë dje në veri, Afrim Bunjaku ka thënë se ai është hero i secilit shqiptar dhe se ka bërë sakrificën më sublime, duke u bërë hero i kombit.
“Jemi mbledhur këtu me zemër të thyer dhe pikëllim të thellë për të nderuar një rreshter të përkushtuar i cili dje bëri sakrificën më sublime duke u bërë hero i Kosovës”, ka thënë Osmani.
Presidentja ka thënë tutje se përballja e tij me “terroristët e dirigjuar nga Serbia” ishte beteja e fundit për të por jo dhe fundi i tij.
“Përballja e tij me terroristët e dirigjuar nga Serbia ishte beteja e fundit për të por jo fundi i tij. Prej sot, Afrimi është heroi i secili shqiptar, i secilit qytetar që e do Republikën e Kosovës, sepse ai dje mbrojti integritetin territorial dhe sovranitetin e shtetit tonë”, ka shtuar Osmani.
Ajo ka shtuar se Afrim Bunjaku e ka dëshmuar dje se Kosova është mbi të gjitha dhe se i njëjti do të të kujtohet përherë sa të jetë Republika.
“Do të kujtohet përherë sa të jetë Republika. Heroi më i ri i Republikës, dje dëshmoi se Kosova është mbi të gjitha, Afrim Bunjaku është dëshmi se shteti ynë ka nevojë se secili nga ne t’i bëhet gardian”, ka shtuar tutje ajo.
Ditën e djeshme në Banjskë të Komunës së Zveçanit, u sulmua Policia e Kosovës, ku si pasojë mbeti i vrarë rreshteri policor Afrim Bunjaku nga Samadrexha e Vushtrrisë, një zyrtar policor i plagosur dhe dy të tjerë të lënduar.