“E harruat Policinë”, është shkrimi i vendosur në foltoren e Kuvendit të Kosovës, në ulëset e deputetëve të mazhorancës e para foltores së kryetarit të Kuvendit të Kosovës.
Pak para fillimit të saj, deputetët e AAK-së dhe ata të PDK-së kanë shpërndarë disa letra në ulëset e deputetëve të LVV-së dhe në ulëset e ministrave të qeverisë.
Deputetët e mazhorancës nuk kanë marrë pjesë në seancën e jashtëzakonshme, ku pritet të diskutohet për propozim-rezolutën për mbështetjen urgjente financiare të policisë.
Në emër të Partisë Demokratike të Kosovës, foli shefi i Grupit Parlamentar i kësaj partie, Abelard Tahiri.
Ai tha se kjo seancë është ftuar për mbështetjen e Policisë së Kosovës, ngase konsiderojnë se pas sulmit terrorist të 24 shtatorit, nevojitet miratimi i një rezolute në mbështetje të Policisë së Kosovës.
“Kemi ofruar unitet dhe kemi qenë konstruktivë në dënimin e aktit që ka bërë Serbia në veri të Kosovës. Ky është vendi që sot të mbështetet Policia e Kosovës. Më shumë se kurrë sot vendi ynë do të duhej të tregonte unitet. Të qëndrojmë duarkryq dhe t’i ikim një seancë të tillë, sot për mbështetjen e policisë, siç po e shihni këtë sallë boshe nga LVV-ja, është turp i madh”.