Ministrat e Mbrojtjes kanë filluar takimin në selinë e NATO-s në Bruksel, me ç’rast po diskutohet për sulmet terroriste të Hamasit kundër Izraelit.
Aleatët e NATO-s e kanë dënuar sulmet terroriste të Hamasit kundër Izraelit. Lufta, e cila u ndez nga sulmi befasues i Hamasit në Izrael të shtunën, ka marrë tashmë të paktën 2.400 jetë nga të dyja palët.
Ministri izraelit i Mbrojtjes, Yoav Gallant, i ka informuar ministrat me videokonferencë mbi mizoritë e kryera nga Hamasi kundër civilëve izraelitë dhe shtetasve të disa aleatëve të NATO-s.
Sekretari i përgjithshëm, Jens Stoltenberg, ka theksuar se NATO-ja i dënon sulmet terroriste në termat më të ashpër të mundshëm, duke shtuar se “Izraeli nuk qëndron i vetëm”.
Aleatët kanë shprehur solidaritet me Izraelin, duke e bërë të qartë se ai ka të drejtë të mbrohet me proporcionalitet kundër këtyre akteve të pajustifikueshme të terrorit.
Ata kërkuan që Hamasi të lirojë menjëherë të gjithë pengjet dhe për mbrojtjen sa më të plotë të civilëve. Aleatët e bënë të qartë gjithashtu se asnjë komb apo organizatë nuk duhet të kërkojë të përfitojë nga situata ose ta përshkallëzojë atë.
Një numër i aleatëve të NATO-s e bënë të qartë se ata po i ofrojnë mbështetje praktike Izraelit ndërsa ai vazhdon t’i përgjigjet situatës.