Mediat lokale në Siri kanë raportuar se Izraeli ka nisur sulme ajrore në aeroportet e Damaskut dhe Alepos së Sirisë.
Sipas raportimeve të mëhershme të mediave lokale, sistemet e mbrojtjes ajrore janë përdorur në këto aeroporte për t’iu kundërvënë sulmeve, raporton HindustanTimes.
Qeveri të vendeve të ndryshme kanë shprehur frikë se dhuna mes Izraelit e Hamasit mund të shndërrohet në luftë më të gjerë, duke i përfshirë fqinjët e Izraelit, Sirinë e Libanin.
Sulmet izraelite shënjestruan dy aeroportet kryesore të Sirisë të enjten, tha televizioni shtetëror sirian, në sulmin e parë të tillë që nga sulmi i Hamasit ndaj Izraelit në fundjavë që shkaktoi luftime të ashpra.
“Agresioni izraelit synon aeroportet e Damaskut dhe Aleppos”, raportoi televizioni shtetëror në aplikacionin e mesazheve Telegram, pa dhënë detaje shtesë.
Sulmet izraelite kanë shkaktuar vazhdimisht ndalimin e fluturimeve në aeroportet në Aleppo dhe kryeqytetin Damask, të cilat të dyja kontrollohen nga qeveria e Sirisë së shkatërruar nga lufta.
Sulmet e fundit erdhën pasi Hamasi dhe Izraeli shkëmbyen zjarr të rëndë për të gjashtën ditë, pasi qindra persona të armatosur të Hamasit sulmuan kufirin e Gazës në Izrael të shtunën dhe vranë më shumë se 1,000 civilë, transmeton portali Dukagjini.
Këto sulme izraelite erdhën kur Sekretari amerikan i Shtetit, Antony Blinken vizitoi Izraelin dhe disa orë pasi presidenti iranian Ebrahim Raisi, në një telefonatë me homologun e tij sirian Bashar al-Assad, u bëri thirrje vendeve arabe dhe islamike të bashkëpunojnë në përballjen me Izraelin.
Ndryshe, gjatë më shumë se një dekade lufte në Siri, Izraeli ka nisur qindra sulme ajrore ndaj fqinjit të tij verior, duke synuar kryesisht forcat e mbështetura nga Irani dhe luftëtarët e Hezbollahut, si dhe pozicionet e ushtrisë siriane.
Izraeli rrallë komenton mbi sulmet individuale që kryen në Siri, por ka thënë vazhdimisht se nuk do të lejojë armikun e tij të madh, Iranin, i cili mbështet qeverinë e Asadit, të zgjerojë gjurmën e tij atje.
Irani, i cili mbështet Hamasin, të shtunën festoi sulmin e Hamasit ndaj Izraelit, megjithëse këmbënguli se nuk ishte i përfshirë në të.