Grupi Parlamentar i Aleancës për Ardhmërinë e Kosovës ka kritikuar mazhorancën për bojkotimin e seancave të Kuvendit, si dhe komisioneve parlamentare.
Deputeti Pal Lekaj ka thënë se bojkotimi i kërkesave të opozitës është i paarsyeshëm.
“Qëndrimi i mazhorancës për t’i bojkotuar të gjitha kërkesat e opozitës është e paarsyeshme. Në praktikat parlamentare nuk ka ndodhur që shumica t’i bojkotojë seancat e komisionet. Po na marrin të vetme të drejtë që e kemi, pyetjet parlamentare”, ka thënë ai në konferencë për media.
“AAK prej fillimit të kësaj legjislature ka mbështetur miratimin e marrëveshjeve ndërkombëtare në vlerë prej 830 milionë eurosh. Shuma e fondeve të bllokuara nga sanksionet ndaj kësaj qeverie janë 350 milionë euro, afër 100 milionë euro më shumë se vlera e projekteve në marrëveshje ndërkombëtare”, u shpreh ai.
Lekaj ka shtuar se duhet një zgjidhje për funksionimin normal të seancave.