Kryeministri i Kosovës, Albin Kurti, ka shprehur pikëllimin e tij për vdekjen e ish-presidentit të Finlandës, Martti Ahtisaari, duke e cilësuar atë si një diplomat të shquar dhe një kampion të paqes.
Kurti ka thënë se kontributi i Ahtisaarit ka pasur një ndikim të madh në sigurinë dhe paqen në rajon dhe se puna e tij ka përfshirë drejtat e forta të pakicave në kushtetutën e Kosovës.
Gjithashtu, ai ka shprehur ngushëllimet e tij familjes së Ahtisaarit dhe popullit të Finlandës.
“I pikëlluar për vdekjen e Martti Ahtisaarit, një diplomati i shquar dhe një kampion i paqes, i cili ka kontribuuar shumë për sigurinë dhe paqen në rajonin tonë dhe puna e të cilit ka përfshirë të drejtat e forta të pakicave në kushtetutën tonë. Ngushëllimet e mia familjes së tij dhe popullit të Finlandës”, ka shkruar Kurti në platformën X.
Saddened by the passing of Martti Ahtisaari, a distinguished diplomat and a champion of peace who has contributed greatly to security and peace in our region & whose work enshrined robust minority rights in our constitution. My condolences to his family & the people of Finland. pic.twitter.com/oHHOnZK9tL
— Albin Kurti (@albinkurti) October 16, 2023
Po ashtu, presidentja e Kosovës, Vjosa Osmani, ka shprehur ngushëllime për ndarjen nga jeta të ish-presidentit të Finlandës, Martti Ahtisaari, i cili sipas saj, ishte një figurë e rëndësishme në skenën globale politike dhe një kryenegociator për statusin e Kosovës.
Osmani e ka vlerësuar Ahtisaarin për angazhimin e tij të palëkundur në promovimin e paqes dhe diplomacisë në shërbim të njerëzimit.
“Ai ishte njeriu që tërë jetën e tij ia kushtoi paqes, diplomacisë dhe të mirës për njerëzimin dhe që pati ndikim të jashtëzakonshëm për të tashmen dhe të ardhmen tonë!”, ka thënë presidentja Osmani.
Gjithashtu, ajo ka vlerësuar rolin e jashtëzakonshëm të Ahtisaarit në përmbylljen e procesit të statusit të Kosovës dhe e ka cilësuar atë si një figurë madhështore të historisë së Republikës së Kosovës.
Presidenti Martti Ahtisaari ka vdekur sot në orën 06:40 në Helsinki në moshën 86-vjecare.
Martti Oiva Kalevi Ahtisaari shërbeu si president i Republikës së Finlandës në vitet 1994–2000. Ai ishte presidenti i dhjetë i Finlandës. Para Presidencës së tij, ai ka mbajtur disa poste të rëndësishme në Ministrinë e Punëve të Jashtme të Finlandës dhe në Kombet e Bashkuara.
Pas presidencës së tij, Ahtisaari themeloi organizatën e respektuar të ndërmjetësimit të paqes CMI – Martti Ahtisaari Peace Foundation dhe punoi në negociatat ndërkombëtare të paqes dhe detyrat e ndërmjetësimit. Në shenjë mirënjohjeje për punën e tij afatgjatë për paqen, presidentit Ahtisaari iu dha Çmimi Nobel për Paqe në vitin 2008.