Presidentja e Kosovës, Vjosa Osmani ka pritur në takim lamtumirës ambasadorin e Shqipërisë, Qemal Minxhozi.
Osmani e ka falënderuar amabasadorin Minxhozi për angazhimin e tij të deritashëm dhe i ka uruar suksese në angazhimin e mëtejmë. Ajo e ka vlerësuar bashkëpunimin dhe përkushtimin e ambasadorit për t’i përafruar edhe më shumë qytetarët e vendeve tona.
“Presidentja Osmani deklaroi se bashkëpunimi ndërmjet Kosovës dhe Shqipërisë, sidomos në unifikimin e politikës së jashtme mbetet prioritet, duke thënë se fuqizimi i vazhdueshëm i koordinimit diplomatik është interes jo vetëm i shteteve tona, por edhe i rajonit në tërësi. Në këtë frymë, Presidentja përmendi edhe nevojën e vazhdimit të thellimit të bashkëpunimit ekonomik në mes të dy shteteve tona”, thuhet në njoftimin e Presidencës.
Në këtë takim është diskutuar për zhvillimet e fundit në vend e rajon, si dhe mbi aktin e agresionit të Serbisë kundër Republikës së Kosovës, me ç’rast, presidentja Osmani ka theksuar rëndësinë e Shqipërisë që të jetë “zëri ynë” në të gjitha instancat ndërkombëtare ku Kosova ende nuk ka përfaqësim.
Tutje në këtë njoftim thuhet se presidentja e vendit ka theksuar se shqiptarët në të dy anët e kufirit gjithnjë kanë qenë dhe vazhdojnë të mbeten faktor stabiliteti në rajon, me orientim të qartë euroatlantik.