Sot është bërë një muaj nga sulmi terrorist i 24 shtatorit në Banjskë të Zveçanit, nga i cili mbet i vrarë rreshteri policor, Afrim Bunjaku.
Lidhur me këtë, ministri i Punëve të Brendshme Xhelal Sveçla ka thënë se më këtë sulm, Serbia ka rikonfirmuar që ambiciet e saj për Kosovën as nuk i ka zbehur e as nuk i ka harruar.
“Me këtë sulm, Serbia rikonfirmoi që ambiciet e saj për territorin tonë as nuk i ka zbehur as nuk i ka harruar që nga koha e kasapit të Ballkanit Millosheviq”, ka thënë Sveçla.
Ai ka thënë se Radojçiq, lideri i grupit terrorist, edhe pasi ka pranuar pjesëmarrjen dhe udhëheqjen e sulmit pas publikimit të dëshmive, është liruar menjëherë nga autoritetet e Serbisë.
“Për më keq, Serbia shpalli tre ditë zie për tre terroristët që u neutralizuan nga zyrtarët tanë policor gjatë ballafaqimit të armatosur. Këto fakte dhe jo vetëm, dëshmojnë fuqishëm që Serbia sponsorizon me të gjitha kapacitetet e saj terrorizmin në rajon”, ka shkruar Sveçla.
Ministri i Punëve të Brendshme ka thënë tutje se pa sanksionimin e Serbisë dhe ndëshkimin e 24 shtatorit e ardhmja nuk është e përcaktuar qartë për paqe dhe demokraci në rajon.
Sveçla është shprehur se heroi Afrim Bunjaku me rënien e tij ka mbrojtur Kosovën dhe qytetarët e saj, kështu duke shpërfaqur edhe kriminalitetin e terrorizmin e sponsorizuar nga Serbia “që e kemi thënë prej kohësh”.