Kryeministri i Shqipërisë, Edi Rama, ka thënë se është krenar me mbështetjen e Shqipërisë për procesin e normalizimit të raporteve në mes të Kosovës dhe Serbisë, dhe se këtë do ta vërtetojë me një vizitë së shpejti në Kosovë.
Ai, përmes një postimi në rrjetin social X, ndonëse ka shprehur mbështetjen e tij për marrëveshjen bazë, ka thënë se draft-statuti i Asociacionit i Komunave me Shumicë Serbe “i pranuar nga Kosova dhe Serbia” është një draft i BE-së.
“Nuk mund të jem më krenar për kontributin e vendosur dhe konkret të Shqipërisë në procesin e vështirë të vazhdueshëm të normalizimit të marrëdhënieve ndërmjet Kosovës dhe Serbisë. Megjithatë, draft-statuti i Asociacionit i pranuar nga Kosova dhe Serbia si dokument i përshtatshëm pune është një draft i BE-së”, ka shkruar Rama.
I couldn't be prouder of Albania's firm and concrete contribution to the ongoing difficult process of normalizing relations between Kosovo🇽🇰& 🇷🇸Serbia. However, the ASMM draft statute accepted by Kosovo and Serbia as a suitable working document is an 🇪🇺EU draft.
🇦🇱Albania will…
— Edi Rama (@ediramaal) November 2, 2023
Tutje, ai ka thënë se Shqipëria do ta mbështesë fuqimisht Kosovën në zbatimin e Marrëveshjes Themelore dhe do të vazhdojë të luajë rolin e saj në promovimin e paqes, të stabilitetit dhe të bashkëpunimit rajonal ndërmjet të gjitha vendeve fqinje.
“Shqipëria do ta mbështesë fuqimisht Kosovën në zbatimin e Marrëveshjes Themelore dhe do të vazhdojë të luajë rolin e saj në promovimin e paqes, të stabilitetit dhe të bashkëpunimit rajonal ndërmjet të gjitha vendeve në fqinjësinë tonë. Së shpejti do të shkoj në Prishtinë për të treguar personalisht mbështetjen time”, ka vijuar ai.