Pas më shumë se tetë orësh diskutim ka përfunduar seanca e së premtes në Kuvendin e Kosovës.
Me kërkesë të partive opozitare, kryeministri i Kosovës, Albin Kurti, raportoi të premten më 3 nëntor para Kuvendit për draft-statutin e propozuar nga ndërkombëtarët për themelimin e Asociacionit të Komunave me shumicë serbe në Kosovë dhe për takimet e fundit në Bruksel.
Kurti, në këtë seancë tha se Draftstatuti i BE-së nuk është “Zajednica”, e cila e parashihnin marrëveshjet e vitit 2013/2015.
Sipas tij, ai e ndërpret “trashëgiminë mosnjohëse të Kosovës që ishte çimentuar në marrëveshjet e 2013 dhe 2015”.
Ai megjithatë tha se draft-statutin zyrtarisht ende nuk e ka pranuar. “Ta pranosh nënkupton të pajtohesh që të ndërmarrësh obligime për zbatimin e draftit”, tha ai, duke shtuar se ai ka ofruar që ta nënshkruajë atë dhe “si rrjedhojë ta pranoj”.
Shefi i ekzekutivit deklaroi para deputetëve se nuk mund të ofrojë detaje të draft-statutit. Ai tha se draft-statuti iu prezantua nga përfaqësuesit e “Pesëshes së Madhe” më 21 tetor në Prishtinë, të cilët, sipas tij, “më kërkuan garancione që drafti të mos e bëj publik, për shkak që publikimi i tij do të keqpërdorej në dëm të kontributit të qeverive sponsorizuese”.
Po ashtu Kurti, ka thënë se nëse në Bruksel do t’i ofrohej vetëm nënshkrimi i draftstatutit për Asociacionin, nuk do ta pranonte.
Kurti ka theksuar se e ka pranuar draftin e Asociacionin si pjesë të një pakete, ku përfshihet edhe Marrëveshja Bazë e Aneksi i Zbatimit.
Ndërsa, opozita pati mjaft kritika duke thënë se Kurti nuk shpalosi mjaft detaje nga draft-statuti për Asociacionin.
Kryetari i PDK-së, Memli Krasniqi, i është drejtuar kryeministrit se në fjalimin e tij nuk tregoi se çfarë i kanë thënë emisarët perëndimorë. Ai ka theksuar se në Kuvend është thirrur të tregojë se çfarë përmban drafti i BE-së, por se deputetët nuk e dëgjuan këtë.
Ndërsa, kryetari i Lidhjes Demokratike të Kosovës, Lumir Abdixhiku, ka thënë se e ka të vështirtë ta kuptojë kundërthënien e Kurti se është shprehur i gatshëm ta nënshkruajë draftin e BE-së për Asociacionin, por që s’e ka pranuar atë.
Ndërsa, shefi i GP të AAK-së, Besnik Tahiri, ka thënë se Kurti ka shkelur të gjithë filozofinë e vet politike prej ditës së parë e deri sot për të arritur qëllimin e vet.
Ndryshe, pas takimeve me liderët evropianë dhe të Bashkimit Evropian në Bruksel më 26 tetor, Kurti deklaroi se ka pranuar propozimin për draft-statutin e Asociacionit dhe ishte i gatshëm të nënshkruante marrëveshje për normalizimin e raporteve me Serbinë, por kjo ishte kundërshtuar nga presidenti serb, Aleksandër Vuçiq.