Nënkryetari i Lidhjes Demokratike të Kosovës, Lufti Haziri, ka thënë se mesazhi i ambasadorit të ShBA-së në Kosovë, Jeffrey Hovenier, ishte që t’ia largojë, siç u shpreh ai, popullit frikën e “Zajednicës” që e mbolli Albin Kurti.
Ai, përmes një postimi në Facebook, ka shkruar se Albini është bërë kryeministër, por siç u shpreh ai, frikën që e mbolli nuk e largoi.
“Po debatohet e analizohet se kujt ia adresoi mesazhin amabasadori amerikan, shkëlqesia e tij, Hovennier”.
“Shumë e drejtë, por mesazhi është për popullin e Kosovës, për t’ia larguar frikën nga Zajednica që e mbolli vetë Albin Kurti opozitar! Albini u ba kryeministër, por frikën që e mbolli, nuk e largoi. Përkundrazi”, ka shkruar Haziri.
Në një intervistë për Atlantic Council, Hovenier theksoi se draft-statuti i BE-së përmbush pritjet e ShBA-së se nuk është krahinë autonome brenda Kosovës dhe se është plotësisht në përputhje me Kushtetutën e Kosovës.
“Duhet të jetë në përputhje me vendimet e Gjykatës Kushtetuese. Nuk duhet të ketë kompetenca ekzekutive. Kjo nuk është krahinë autonome brenda Kosovës. Ekziston një urgjencë, ka kërkesë që gjërat të lëvizin shpejt. Nuk ka të bëjë vetëm me Asociacionin, ka të bëjë me zbatimin e plotë të të gjitha obligimeve që i kanë Kosova dhe Serbia në Marrëveshjen Bazë dhe aneksin e Ohrit. Jemi duke punuar me Qeverinë e Kosovës që gjërat të ecin para”, ka thënë Hovenier.
Ndryshe, dje Hovenier në një deklaratë para mediave ka thënë se draft-statuti që i është propozuar Kosovës për formim të Asociacionit të Komunave me shumicë serbe, i përmbush të gjitha kriteret që i parashohin Shtetet e Bashkuara për të.
Hovenier ka thënë para mediave se, megjithatë, fjalën e fundit për këtë draft duhet ta japë Gjykata Kushtetuese e Kosovës dhe një prej dispozitave të draftit është se ai do të analizohet nga kjo gjykatë.