Rektorati i Universitetit të Prishtinës (UP), përsëri është bërë cak i dyshimeve për një mjet shpërthyes.
Të martën në mesditë, në adresë të Rekotratit të UP-së ka ardhur një email përmes adresës elektronike për një alarm se brenda objektit është vendosur një bombë apo mjet tjetër shpërthyes.
Këtë rast e ka konfirmuar për Portali D, zëdhënësja për rajonin e Prishtinës në Policinë e Kosovës, Flora Ahmeti, e cila ka thënë se me të marrë këtë informatë Policia ka dalë menjëherë në vendin e ngjarjes për të marrë veprimet e nevojshme për ta menaxhuar situatën.
“Rreth orës 12:00 është pranuar informata për dyshimet që ndërlidhen me një shpërthim të mundshëm në Rektoratin e Universitetit “Hasan Prishtina” në Prishtinë. Informacionet e para flasin se kanosja e dyshimtë ka ardhur përmes postës elektronike. Policia menjëherë ka dalë në vendin e ngjarjes dhe ka nisur ndërmarrjen e veprimeve operative të nevojshme për të menaxhuar me situatën”, ka deklaruar ajo.
Një alarm i ngjashëm kishte ardhur në adresën e Rektoratit më datën 17 maj të këtij viti, por i njëjti kishte rezultuar alarm i rremë.
Alarm për mjet shpërthyes kishte edhe më datën 18 maj të këtij viti, në shkollën “Xhevdet Doda” të Komunës së Prishtinës, i cili po ashtu doli se ishte alarm i rremë.