Në një takim me përfaqësuesin special të BE-së për dialogun Kosovë – Serbi, Miroslav Lajçak, presidenti i Serbisë, Aleksandër Vuçiq, ka deklaruar se Serbia është e hapur për dialog dhe angazhim për t’i respektuar marrëveshjet ekzistuese.
Siç raporton N1, Vuçiq në takim me Lajçak ka theksuar nevojën për formimin e Asociacionit, duke shtuar se vendi i tij qëndron për deeskalim, paqe dhe stabilitet në rajon.
Drejtori i Zyrës së ashtuquajtur për Kosovën në Qeverinë e Serbisë, Petar Petkoviq, ka thënë se Serbia në Bruksel do të marrë një grup ekspertësh, me të cilët, do të diskutojë për draftin e Asociacionit.
Pas takimit që ai dhe Vuçiq e kishin me emisarin evropian për dialogun, Petkoviq u shpreh i “ngazëllyer” që më në fund siç ka thënë po nisin bisedimet për draft-statutin e Asociacionit.
Ndërsa, më 7 nëntor, Lajçak vizitoi Kosovën, ku diskutoi me përfaqësuesit e Qeverisë dhe të opozitës për draft-statutin e ri për Asociacionin e komunave me shumicë serbe.
Propozimi i ri “për një model modern evropian” për draft-statutin e Asociacionit u është prezantuar Kosovës dhe Serbisë nga anëtarët e “Pesëshes së Madhe” gjatë vizitës së tyre në këto dy shtete më 21 tetor.
Delegacioni përbëhej nga përfaqësues të BE-së, Shteteve të Bashkuara, Gjermanisë, Francës dhe Italisë.
Kryeministri i Kosovës, Albin Kurti, është shprehur kundër një asociacioni njëetnik, duke argumentuar se mund të cenojë funksionalitetin e shtetit.
Megjithatë, gjatë një takimi me liderët evropianë në Bruksel më 26 tetor, Kurti tha se ka pranuar draft-statutin e ri të propozuar.
Dokumenti i këtij draft-statuti nuk është bërë publik. Megjithatë, Kurti ka thënë se ai është shkruar më shumë në kujdes ndaj germës sesa frymës së Kushtetutës së Kosovës.