Avokati Tomë Gashi nuk është lejuar të marrë pjesë në intervistimin e ministres së Drejtësisë, Albulena Haxhiu, e cila pritet të intervistohet nga Prokuroria Speciale për rastin Dehari, pas deklaratave të bëra në rrjetet sociale se ekzistojnë prova që Astrit Dehari është vrarë.
Ai ka thënë se Prokuroria padrejtësisht nuk e ka lejuar atë të marrë pjesë në intervistim, përkundër që, sipas tij, kërkesën e ka bërë me kohë.
Gashi ka theksuar se prokurori i rastit, Afrim Shefkiu, nuk të drejtë të vazhdojë me intervistime.
“Hetuesit policorë u sollën shumë mirë, mirëpo më thanë që me kërkesë të prokurorit të rastit, nuk më lejohet pjesëmarrja. Ne si familje kemi kërkuar përjashtimin e këtij prokurori dhe ky prokuror nuk ka të drejtë që të vazhdojë me intervistim të personave”, ka thënë në Gashi para mediave.
Edhe në Facebook, Gashi e ka kritikuar Prokurorinë, duke e cilësuar si selektive, ndërsa ka vazhduar kritikat për prokurorin e rastit.
“Edhe një kërkesë për Prokurorinë, për lejimin e pjesëmarrjes time me rastin e dhënies së deklaratës së ministres së Drejtësisë, znj. Albulena Haxhiu, në rastin e vrasjes se Astrit Deharit. Prokuroria, për arsye të panjohura, vepron në mënyrë selektive – herë duke lejuar e herë duke mos lejuar pjesëmarrjen time në intervistimin e dëshmitarëve në këtë rast.