Ish-inspektori i AKI-së, Shkelzen Sopjani, njëherësh avokat, ka komentuar vizitën e shefit të NATO-s, Jens Stoltenberg, në Ballkanin Perëndimor.
Ai ka thënë se kjo vizitë nuk është e rastësishme dhe lidhet me zgjedhjet në Serbi, dhe me ndikimin rus në Ballkan, që e ka paralajmëruar para disa ditësh presidenti ukrainas, Volodymyr Zelensky.
Po ashtu, edhe paralajmërimet e kryeministrit të Kosovës, Albin Kurti, se në Rashkë të Serbisë po riorganizohet grupi paramilitar e terrorist i Milan Radoiçiqit, me instruksione dhe mbështetje të shtetit të Serbisë, po konsiderohen serioze.
Në emisionin “FIVE”, avokati, Sopjani dhe Murat Mehmeti, ish-hetues policor në veri, kanë thënë se postimi i Kurtit është kuptuar si kërcënim serioz, pasi, siç theksojnë ata, ndonëse nuk do të ketë ndonjë sulm klasik ndaj ushtrisë së Kosovës, nuk përjashtohet ndonjë sulm sporadik.
“Rreziku ka qenë gjithmonë aty, grupi i Radojçiqit nuk është se ka pësuar ndonjë dëmtim të madh, është goxha aktiv në fushatën zgjedhore në Serbi, nuk ka pasë ndonjë pasojë. Postimi i Kurtit ke i drejtpërdrejtë, është i saktë, marrë parasysh se iu referua kidnapimit të policëve që ka ndodhë më herët”, ka thënë Sopjani.
Sopjani ka thënë se Serbia e ka marrë mësimin nga sulmi i 24 shtatorit.
Ndërsa, Mehmeti ka thënë se “Vuçiqi ka nevojë për diçka që do t’ia pastronte fytyrën, Kosova nuk do përjashtohej nga një sulm sporadik, por nuk mund të ketë sulm klasik ndaj ushtrisë”.
Mehmeti ka thënë se reagimi i rreshterit policor, Afrim Bunjaku, që mbeti i vrarë në veri gjatë kryerjes së detyrës më 24 shtator nga sulmi i grupit terrorist në Banjskë, e ka ndryshuar planin e Serbisë.
Ndryshe, shefi i NATO-s, Jens Stoltenberg, të hënën ishte për vizitë në Kosovë ku u prit në takim nga krerët e shtetit, Vjosa Osmani dhe Albin Kurti.
Pas Kosovës, Stoltenberg do të vizitojë Serbinë dhe Maqedoninë e Veriut.