Një makinë ka shpërthyer në pikëkalimin kufitar në anën amerikane të urës SHBA-Kanada në Ujëvarën e Niagarës, duke shkaktuar vdekjen e dy personave brenda makinës.
Njoftimi u bë nga një zyrtar për Associated Press në kushte anonimiteti.
Kryeministri kanadez, Justin Trudeau, e ka vlerësuar situatën si serioze.
“Është e qartë se është një situatë serioze në Ujëvarën e Niagarës”, ka deklaruar Trudeau, teksa ishte në Parlament.
Më pas, ai u ka thënë ligjvënësve se i duhej të largohej nga Parlamenti për të marrë më shumë informacione për këtë ngjarje.
Shpërthimi ka ndodhur në urën Rainbow në anën e SHBA-së, e cila lidh dy shtetet dhe kalon përmes Ujëvarës së Niagarës.
Tri pikëkalimet kufitare të tjera u mbyllën si masë parandaluese.
Autoritetet kanadeze filluan kontrollet e makinave, ndërsa Trudeau njoftoi se “masat shtesë” po ndërmerren në pikat kufitare.
FBI po heton ngjarjen, ndërsa ekipet policore për mjete shpërthyese janë të angazhuara në vendin e ngjarjes.
Fotografitë në mediat sociale tregojnë tym të dendur pranë pikëkalimit kufitar dhe makinën e shpërthyer shumë afër kufirit.
Prokurori i Përgjithshëm i SHBA-së, Merrick Garland dhe guvernatorja e Nju Jorkut janë informuar për ngjarjen.
Komisioni i urës në Ujëvarën e Niagarës ka njoftuar se ka mbyllur tri pikëkalimet kufitare.