Ministria e Industrisë, Ndërmarrësisë dhe Tregtisë ka kthyer marzhën e fitimit për produktet e naftës.
Siç thuhet në njoftimin e MINT-it, marzha tregtare maksimale e lejuar e shitjes me shumicë është dy centë për litër, ndërsa me pakicë deri 12 centë për litër.
Vendimin, MINT-i e ka arsyetuar me periudhën kur bashkatdhetarët janë në Kosovë.
“Ky vendim ka për qëllim parandalimin e çrregullimit në treg me çmimet e naftës, sidomos gjatë muajit të festave të fundvitit, kur bashkatdhetarët tanë janë të pranishëm në atdhe, e gjithashtu me qëllim mbrojtjen e konsumatorit, mbrojtjen e konkurrencës, si dhe për t’i mënjanuar çrregullimet tjera në treg”, thuhet në njoftim.
Ministria ka thënë po ashtu se bazuar nga monitorimi i rregullt i tregut të produkteve të naftës, është vënë re se ka pasur mospërshtatje të çmimeve vendore krahasuar me lëvizjet e çmimeve në tregun botëror.
Kjo masë nga Ministria ka qenë në funksion në disa raste muajve të fundit.
Vendimi i MINT-it është marrë në ditën kur Gjykata Kushtetuese e shpalli të pavlefshëm ligjin për caktimin e çmimeve tavan për produktet bazë.