Deputeti nga radhët e Partisë Demokratike të Kosovës (PDK), Enver Hoxhaj, ka kritikuar kryeministrin Albin Kurti, i cili ka thënë sot se Statutin e Asociacionit duhet ta publikojnë ndërkombëtarët.
Hoxhaj, përmes një shkrimi në Facebook, ka theksuar se “asnjëherë, as në Rambuje as në Vjenë e as në Bruksel, nuk është vendosur për një çështje kaq të rëndësishme politike pa kurrfarë procesi politik, pa transparencë, pa llogaridhënie dhe pa legjitimitet demokratik”.
“Sikurse që Albin Kurti e ka pranuar dhe po e mban të fshehtë Statutin e Asociacionit, duke na thënë se jo ai si kryeministër i Kosovës, por ndërkombëtarët duhet ta bëjnë publik atë, kur çdokush e ka parë këtë dokument në Serbi, ndërsa po mbahet fshehtë nga opinioni publik, partitë politike dhe deputetët e Kuvendit të Kosovës!”, ka shkruar Hoxhaj.