Sipas kërkesës së Prokurorisë, Fatmir Tahiri dhe Albin Beqiri dyshohen për veprën – dhënia e ndihmës gjatë kryerjes së veprës penale të grabitjes.
Sipas dosjes së Prokurorisë, i pandehuri Albin Beqiri, duke prezantuar letërnjoftimin e tij në kompaninë “Ipko” në Mitrovicë ka blerë 10 numra të telefonit për të pandehurin Fatmir Tahiri, dhe këta numra ia dorëzon Fatmir Tahirit.
Njëri prej këtyre numrave të telefonit është përdorur për të kontaktuar pronarin e automjetit nga i cili grabitësit e blejnë automjetin, i cili përdoret gjatë grabitjes në Suharekë.
Po ashtu, grabitësit nga aparati telefonik që e kanë përdorur këtë numër komunikojnë mes vete me dy numra të telefonisë “Ipko” gjatë dhe menjëherë pas grabitjes më 22 nëntor 2023.
Masa e paraburgimit për ta është shqiptuar në kohëzgjatje prej 1 muaji, duke llogaritur nga data e arrestimit 25.11.2023.
Vendimi është marrë nga Gjykata Themelore e Prizrenit.
Kujtojmë se, dy persona janë arrestuar nga ana e Policisë së Kosovës për rastin e grabitjes së një argjendarie në Suharekë.
Burime brenda Policisë së Kosovës kanë konfirmuar për Dukagjinin se personat e arrestuar nuk janë ata që e kanë kryer grabitjen por ndihmësit e tyre.
Burimet thonë se ata janë nga rrethina e Mitrovicës.
Ndryshe, mbrëmjen e së mërkurës të datës 22 nëntor ka ndodhur një plaçkitje e armatosur në një argjendari në qytetin e Suharekës.
Në tentativën për ta parandaluar plaçkitjen, është plagosur një polic i Kosovës në këmbë.