Komuna e Prishtinës është binjakëzuar me qytetin Cospicua të Maltës, me qëllim të thellimit të bashkëpunimit, në fushat e kulturës, edukimit, shkencës dhe kërkimit.
Kryetari i Komunës së Prishtinës, Përparim Rama, përmes rrjetit social “Facebook” ka njoftuar se Komuna e Prishtinës është binjakëzuar me qytetin Cospcua të Maltës.
“Nënshkrova marrëveshjen e binjakëzimit të Prishtinës me Qytetin Cospicua të Maltës, me kryetarin e këtij qytetit, Marco Emanuel Agius, për të thelluar bashkëpunimin mes vendeve tona, në fushat e kulturës, edukimit, shkencës dhe kërkimit”, ka shkruar Rama.
Sipas tij kjo marrëveshje ka për qëllim inkurajimin e qytetarëve që të shkëmbejnë vizita, të takohen e provojnë kultura të ndryshme për të promovuar dhe forcuar respektin, kulturën, solidaritetin mes dy vendeve, si dhe bashkëpunimin në fushat e tregtisë e industrisë.
Tutje, kryetari Rama ka njoftuar se kryetarin e Cospicuas, Marco Emanuel Agius e ka ftuar për vizitë në Prishtinë.