Komuna e Fushë-Kosovës është ankuar se Qeveria e ka lënë këtë komunë pa asnjë investim kapital në projeksionet buxhetore për vitin 2024.
Në reagimin e komunës thuhet se kjo është qasje diskriminuese dhe ilegale.
“Komuna e Fushë-Kosovës është një nga komunat me taksapaguesit më të mëdhenj dhe asnjëherë më parë nuk është përballur me një ndasi politike kaq agresive, me një qasje të tillë skajshmërisht refuzuese për nevojat e investimeve kapitale në dobi të qytetarëve, e cila është e paprecedent në gjithë historinë politike të pasluftës”, thuhet në njoftim.
Tutje, aty theksohet se “kjo qasje e Qeverisë është e paligjshme, diskriminuese dhe në kundërshtim me Kushtetutën, do të ishte e nevojshme ndërhyrja e institucioneve të presidentit të Republikës së Kosovës dhe Gjykatës Kushtetuese si garantues dhe balancues”.
“Qeveria duhet të jetë në shërbim të gjithë qytetarëve të Republikës së Kosovës, dhe jo vetëm komunave të linjës së njëjtë politike me Qeverinë. Edhe përkundër kësaj, komuna e Fushë-Kosovës do të vazhdojë punën përmes investime vetanake dhe do të zhvillohet me ritëm edhe më të shpejtë duke mbetur njëra nga komunat më të fuqishme në Republikën e Kosovës”, thuhet më tej në njoftim.