Në nderim të avokatit, Andre Strong, i cili vdiq gjatë ditës së hënë (dje), janë ndezur qirinj para Teatrit Kombëtar të Kosovës.
Në këtë organizim që u bë nga platforma “Liria ka emër”, ndër të tjerë, mori pjesë edhe i pari PDK-së, Memli Krasniqi, i cili tha se avokati Strong kishte mision drejtësinë.
“Një qiri për mikun e Kosovës! Dje, në mënyrë të papritur dhe të parakohshme, na la miku ynë, avokati i Kadri Veselit, Andrew Strong.
Përtej rolit të tij si avokat, Andrew ishte një njeri i mirë dhe i drejtë, i cili me tërë qenien e tij u vu në mbrojtje të Ushtrisë Çlirimtare të Kosovës dhe të shtetit tonë. Këtë ai nuk e bëri vetëm pse e kishte profesion, por sepse drejtësinë e kishte mision. Andrew e dinte pafajësinë e krerëve të UÇK-së, siç e dinte pastërtinë e luftës së popullit tonë për liri, prandaj, me mendje e zemër u përkushtua secilën ditë të angazhimit të tij në këtë proces”, ka shkruar Krasniqi në Facebook.
Krasniqi më tej tha se Strong ishte “një amerikan që fliste shqip, e Kosovën e donte shumë”.
“Prehu në paqe, mik i dashur”, ka përfunduar Krasniqi.