Në Dhomat e Specializuar të Kosovës (DhSK) në Hagë, ka filluar dëshminë dëshmitari i 10-të i mbrojtjes, Safet Gashi, me kodin W4405, në gjykimin ndaj Pjetër Shalës.
Gashi tregoi se në cilën moshë i është bashkuar Ushtrisë Çlirimtare të Kosovës, derisa tha se në qytetin e Kukësit ka shkuar për të marrë armatim.
“Ushtrisë Çlirimtare të Kosovës i jam bashkuar si 20 ose 21-vjeçar. Jam kyçyr në Gorozhub. Ma kanë dhënë uniformën dhe kemi shkuar në Kolsh apo në Kalimash, ku kemi qëndruar diku rreth katër ditë. Në Kukës kam shkuar kryesisht për të marrë armatim, mirëpo nuk kam qenë asnjëherë në Shtabin e UÇK-së atje, për të cilin po flitet”, tha ai.
Pyetjet për këtë dëshmitar, ka filluar që t’i parashtrojë avokati i Shalës, Jean-Louis Gilissen, me kërkesë të së cilit seanca pastaj kaloi në sesion privat.
Ndryshe, në fillim të seancës, Zyra e Prokurorit të Specializuar dhe mbrojtja e viktimave, i bënë parashtrimet e tyre lidhur me kërkesën e mbrojtjes së Shalës për vizitë psikologjike.
Mbrojtja e viktimave dhe ZPS-ja nuk kundërshtuan që raporti i ekspertes Vanessa Milazzo mbi gjendjen e shëndetit mendor të Shalës të përfshihet në prova nga ana e mbrojtjes.