Avokati Xhevdet Smakiqi, në një lidhje direkte në emisionin “FIVE” në RTV Dukagjini, për rastin e Hasan Dakajt që është ndaluar në Serbi, ka thënë se të njëjtit i është caktuar masa e paraburgimit prej një muaji, dhe se tashmë janë në fazën e procedurës ku do të shtrohet një ankesë.
“Unë për të qenë i sigurtë kam kërkuar sot që të na konfirmojnë nëse e kanë dorëzuar ankesën apo jo, por deri tani nuk kemi asnjë konfirmim, sepse jemi në një situatë që konsiderojmë se Dakaj është ndaluar politikisht, si pjesëtar i Ushtrisë Çlirimtare të Kosovës, dhe atij i është ndaluar lëvizja e lirë nën dyshimin për krime lufte”, ka thënë Smakiqi.
Avokati ka thënë se Dakaj asnjëherë nuk ka qenë i dyshuar për vepra penale, as në Kosovë, por as jashtë Kosovës.
“Prokuroria e Serbisë krejt gabimisht nuk e ka indetifikuar as personin që po kërkon, sepse Dakaj në atë kohë ishte 19-vjeçar dhe nuk ka mundësi ndoshta asnjë dëshmitar, përveç sajimeve që do të mund të indentifikonte një 19-vjeçar tashmë kur i ka afro 50 vjet”, ka thënë Smakiqi.
Sipas avokatit, ky është një gabim faktik që prokuroria e Serbisë është duke e bërë.
“Kjo për neve ka qenë dhe është një gabim faktik të cilin prokuroria e Serbisë është duke e bërë, sepse krejt gabimisht e ka arrestuar Hasan Dakajn”, ka shtuar Smakiqi.
Tutje, Smakiqi ka theksuar se presioni diplomatik mund ta lirojë ish-pjesëtarin e Ushtrisë Çlirimtare të Kosovës, Hasan Dakaj.
Ndryshe, më 5 janar të këtij viti, në pikën kufitare me Serbinë në Merdar, është arrestuar nga policia serbe ish-pjesëtari i Ushtrisë Çlirimtare të Kosovës, Hasan Dakaj.
Lexo dhe: Arrestohet në Merdar veterani i UÇK-së Hasan Dakaj, flet avokati i tij
Avokati i tij, Xhevdet Smakiqi, ka thënë se familja Dakaj është nën frikë dhe ankth të madh pasi policia serbe ka arrestuar familjarin e tyre dhe, sipas tij, i njëjti është dërguar në qendrën e ndalimit në Kushumli.