Forumi i Rinisë së Lidhjes Demokratike të Kosovës kanë ndezur qirinj për 18-vjeçarin, Lulzim Fejzullahu, i cili ndërroi jetë si pasojë e rrahjes nga dy persona, të cilët gjenden në paraburgim.
“Sot, të gjithë jemi Lulzimi!”.
Kryetari i Forumit të Rinisë, Paris Guri, ka thënë se të rinjve duhet t’u sigurohet më shumë mbrojtje në rrugë, në shkollë dhe në të gjitha vendet ku ata veprojnë.
“Lulzimin nuk guxojmë asesi ta shohim si një lajm shtesë në kronikën e zezë. Sot të gjithë jemi Lulzimi, sepse nuk është vrarë vetëm Lulzimi, është rrezikuar siguria e të rinjve, është shuar shpresa për jetë të mirë”, thuhet në njoftim.
Guri ka theksuar se bashkë me forumin e degës në Podujevë kanë kërkuar llogaridhënie e përgjegjësi nga institucionet publike.
“Kanë obligim kushtetues për të mbrojtur të drejtat e njeriut! Rasti tronditës i Lulzimit duhet të jetë alarmues për të gjithë; duhet t’i thërrasë ndërgjegjes institucionale dhe ndërgjegjes sonë kolektive në mënyrë që masat parandaluese dhe mbrojtëse për sigurinë e të rinjve të ndërmerren në mënyrë emergjente”.