Se nuk do të heqin dorë nga reforma e vetingut në sistemin e drejtësisë e në sistemin prokurorial pavarësisht interesat e kujt mund t’i prishin deklaroi ministrja e Drejtësisë, Albulena Haxhiu, teksa drejtoi akuza ndaj Këshillit të Prokurorial të Kosovës (KPK).
Sipas saj, në krye të KPK-së ka prokurorë në “pozita të larta janë ata që e kanë mbytë sistemin prokurorial”.
“Sikur ta kishim Këshillin Prokurorial në nivel të detyrës, nuk kishim pasë nevojë për vetingun në sistemin e drejtësisë, sepse është Këshill si mekanizëm që e përmirëson sistemin prokurorial. Është si mekanizëm që përmes mekanizmave i disiplinon prokurorët të cilët i kanë shkulur detyrat e tyre.
Mirëpo këtë s’e kemi, Këshilli Prokurorial i ka mbyllë sytë përballë shkeljeve të prokurorëve. Është e vërtetë që ka prokurorë që janë të mirë, por fatkeqësisht në pozita të larta janë ata që e kanë mbytë sistemin prokurorial. Prandaj është e rëndësishme reforma e vetingut. Prandaj është e rëndësishme reforma në Këshillin Prokurorial. Prandaj nuk do të heqim dorë nga kjo reformë, pavarësisht interesave të kujt mund t’i prishim”, ka thënë Haxhiu në Kuvend.