Fehmi Kupina, ish-asamblist i LDK-së, tani i pavarur, është zgjidhur kryesues i Kuvendit Komunal të Prishtinës me 22 vota për, duke marrë shumicën e votave nga përfaqësuesit e Vetëvendosjes.
Tetë asamblistë të pranishëm kanë abstenuar, ndërsa ata të LDK-së e kanë bojkotuar seancën e jashtëzakonshme.
Kupina u zgjodh pas tre raundeve votimi në seancën e jashtëzakonshme që u mbajt të enjten.
Ai udhëhoqi Kuvendin kur mori mandatin e tij nga Lidhja Demokratike e Kosovës, por më vonë u shkarkua dhe doli si asamblist i pavarur.
Kupina do të zëvendësojë Pëllumb Bajqinovcin e LDK-së në krye të Kuvendit Komunal, pasi Bajqinovci u shkarkua nga ky post pas prishjes së koalicionit mes LDK-së dhe PDK-së.
Në deklaratën e tij pas zgjedhjes, Kupina ka premtuar për punë në përmirësimin e jetës së qytetarëve, duke theksuar nevojën për bashkëpunim me të gjithë dhe distancimin nga interesat politike dhe partiake.
Ndërkaq, shefi i asamblistëve të Vetëvendosjes, Gëzim Sveçla, ka akuzuar partinë në pushtet dhe kryetarin Përparim Rama për tendencë për kapje të Kuvendit Komunal.
Ai ka thënë se Vetëvendosja nuk ka emër për kryesues, por do ta mbështesnin cilindo emër që do ta propozojë shumica.