Në moshën 64 vjeçare, ka vdekur sot Xhavit Ferizi, ish-pjesëtar i UÇK-së, nga rajoni i Drenicës.
Ferizi, që nga paslufta njihej për afërsinë me ish-Presidentin e Kosovës, Hashim Thaçi.
Ai kishte shërbyer që nga paslufta si truprojë personale e Thaçit, e sipas bashkëpunëtorëve të tij, njiheshin që nga koha e ilegalitetit.
“E kaluara e tij lidhet më kohen e ilegalitetit ku UÇK ka qenë e organizuar vetëm në Drenicë. Në shtëpinë e tij ka qëndruar një pjesë e armatimit që kishte ardhur nga Shqipëria, derisa në katin nalt të shtëpisë së tij jetonin njerëzit në katin poshtë ka qenë një arsenal i armatimit”, tha Ismail Syla- Ish-këshilltar i ish-Presidentit Hashim Thaçi.
I njohur për rrethin me nofkën “Raketa”, vlerësohet për kontributin e tij.
Për vdekjen e Ferizit, ngushëllime shprehën edhe shumë zyrtarë të Partisë Demokratike të Kosovës.
Kryetari i kësaj partie, Memli Krasniqi duke ngushëlluar familjen tha se Xhavit Ferizi do të kujtohet si koleg unik e luftëtar i paepur i lirisë.
Njeri të dashur të familjes, e ka cilësuar edhe Endrit Thaçi, djali i Hashim Thaçit.