Kryetari i Komunës së Podujevës, Shpejtim Bulliqi, ka dënuar sulmin fizik dhe verbal që ka ndodhur ndaj dy të punëtorëve shëndetësor mbrëmë në Qendrën Kryesore të Mjekësisë Familjare në Podujevë.
“E dënoj ashpër sulmin fizik dhe verbal që ka ndodhur ndaj dy punëtorëve shëndetësor mbrëmë në Qendrën Kryesore të Mjekësisë Familjare në Podujevë”, ka shkruar Bulliqi në Facebook.
Sipas Bulliqit, sulmet e tilla ndaj punëtorëve shëndetësorë janë të papranueshme, e në veçanti në vendin e punës, ndërsa tolerimi i tyre krijon precedent të rrezikshëm për të ardhmen duke nxitur pasiguri në punë në mesin e komunitetit shëndetësor.
Tutje Bulliqi, bën thirrje që organet e rendit të trajtojnë shpejt dhe me prioritet këtë rast dhe sipas tij, keqbërësi ta marrë dënimin meritor për kanosje fizike ndaj zyrtarëve publik.