Pas deklaratës së ministrit të Punëve të Jashtme të Rusisë, Sergey Lavrov, i cili ka thënë se Rusia e përkrah Ballkanin e Hapur, duke e quajtur si iniciativë të Serbisë, ka reaguar shefi i stafit të presidentes, Vjosa Osmani.
Blerim Vela, shef i stafit të presidentes së Kosovës, Vjosa Osmani, në një postim në Twitter ka thënë se Lavrov e sheh nismën e “Ballkanit të Hapur” si një instrument për promovimin e hegjemonisë rajonale nga Rusia dhe Serbia.
“Ministri i Jashtëm i Rusisë, Lavrov konfirmon hapur lidhjen në mes synimeve hegjemoniste të Rusisë në Ukrainë dhe synimeve hegjemoniste të Serbisë ndaj Kosovës. Për më tepër, Lavrov e sheh nismën e Ballkanit të Hapur si një instrument për promovimin e hegjemonisë rajonale nga Rusia dhe Serbia dhe për të prishur integrimin në BE dhe NATO”, ka shkruar Vela.
❗️#Russia’s MFA Lavrov openly confirms the link between Russia’s hegemonic goals in #Ukraine to #Serbia’s hegemonic goals towards #Kosovo.
Moreover, Lavrov sees Open Balkan initiative as an instrument for promoting regional hegemony by RUS & SEB, and derail EU/NATO integration. pic.twitter.com/f3Pv2Pdu33
— Blerim Vela (@Blerim_Vela) June 7, 2022
Lidhur me këtë ka reaguar edhe deputeti i Lëvizjes Vetëvendosje, Haki Abazi.
Abazi i ka komentuar deklaratat e Lavrovit, duke shtruar pyetjen se nëse Rusia e përkrah Ballkanin e Hapur dhe njëkohësisht po e shkatërron Ukrainën, a do të thotë se gjithkush që e përkrah këtë iniciativë e përkrah edhe shkatërrimin e Ukrainës.
“Kur Lavrov mbështet konkretisht ‘Open Balkan’, ndërkohë që po shkatërron hapur Ukrainën, a do të thotë kjo se kushdo që mbështet ‘Open Balkan’ po mbështet gjithashtu shkatërrimin e Ukrainës! Dhe çfarë është në të vërtetë Ballkani i Hapur?”, ka shkruar Abazi.
Ndryshe, samiti i radhës i nismës “Ballkani i Hapur”, do të mbahet më shtatë dhe tetë qershor.
Pos tri shteteve themeluese të kësaj iniciative, Serbisë, Maqedonisë së Veriut dhe Shqipërisë, është paralajmëruar edhe pjesëmarrja e dy shteteve të tjera fqinje, Mali i Zi dhe Bosnjë e Hercegovina.
Në takimin i cili do të mbahet në Ohër të Maqedonisë së Veriut, Kosova nuk do të jetë pjesëmarrëse.