Sot, nën udhëheqjen e kryeprokurorit të Prokurorisë Speciale, Blerim Isufaj, është mbajtur takimi me ekipin e përbashkët për përzgjedhjen dhe shënjestrimin e Krimeve të Rënda, ku janë shënjestruar tri raste të reja, me 30 persona të përfshirë në vepra të ndryshme penale.
Prokuroria Speciale e Republikës së Kosovës (PSRK) ka njoftuar se në rastin e parë janë përfshirë 7 persona, prej tyre 4 gjenden në paraburgim dhe tre në masën e arrestit shtëpiak, për veprat penale “Hyrje ne sistemet kompjuterike”, “Mashtrimi”, “Shpëlarje e parave” dhe “Mbajtja në pronësi, kontroll ose posedim të paautorizuar të armëve”.
“Në këtë rast janë konfiskuar 257.540,00 euro, shtatë (7) vetura, nëntë (9) telefona, kompjuterë dhe pajisje kompjuterike, një (1) armë e gjatë dhe një (1) pistoletë”, thuhet në njoftimin e PSRK-së.
Në rastin e dytë janë përfshirë 19 persona, tre prej tyre gjenden në paraburgim për veprën penale “Import, eksport, furnizim, transportim, prodhim, këmbim, ndërmjetësim ose shitje të paautorizuar të armëve apo të materieve plasëse” dhe “Mbajtja në pronësi, kontroll ose posedim të paautorizuar të armëve”.
“Nga ky rast janë konfiskuar tridhjet e pesë (35) armë, katër (4) vetura, gjashtëqind e pesëdhjetë (650, 00) euro, dy (2) telefona dhe fishekë të kalibrave të ndryshëm”, thuhet tutje në njoftim.
Ndërsa, në rastin e tretë janë të përfshirë katër 4 persona për veprat penale “Keqpërdorim i pozitës apo autoritetit zyrtar”, “Dhënia e ndihmës” dhe “Keqpërdorim i pozitës apo autoritetit zyrtar”.