Albana Bytyqi, deputetja nga radhët e Aleancës për Ardhmërinë e Kosovës (AAK), para se të merrej me politikë ajo ka treguar që ka qenë infermiere dhe juriste me profesion.
E ftuar në emisionin “Reload” në TV Dukagjini, Bytyqi ka treguar se me politikë ka filluar të merrej prej vitit 2017, duke shtuar se para këtij viti asnjëherë nuk ka përcjellë e as nuk ka njohur ndonjë nga figurat politike.
Bytyqi ka thënë se ka punuar në kujdesin shtëpiak, si infermiere njëherë në teren e më pas në QKMF në Suharekë, rreth tetë vite.
Pasi u detyrua të jepte dorëheqje prej punës nga QKMF-ja, në Suharekë, për shkak të një kushti që i kishte vendosur pushteti i asaj kohe, ajo vendosi të merrej seriozisht me politikë që ta shihte se si do të prisnin qytetarët e Suharekës.
“Kur kam qenë duke punuar, kemi qenë të orientuar në një parti tjetër, por kur erdhi një parti tjetër në pushtet, ma vendosen një kusht dhe më është dashur ta marrë një vendim, dhe dhashë dorëheqje në qershor të vitit 2017”, ka thënë ajo.
Pas këtij rasti, ajo vendosi të merrej me politikë, madje në vitin 2017 u zgjedh deputetja femër më e votuar në nivel vendi, ani pse nuk mori pjesë asnjëherë në fushata.
Si përfundim, Bytyqi ka thënë se kur qytetari të voton, është obligim moral që të punosh për qytetarët dhe vendin.