Raporti vjetor i Departamentit Amerikan të Shtetit për të drejtat e njeriut ngre shqetësime të mprehta për luftën midis Hamasit dhe Izraelit në Gaza, duke përmendur akuzat për krime lufte.
Raporti, i cili mbulon vitin 2023, vuri në dukje se “grupet e të drejtave të njeriut raportuan abuzime të gjera dhe në shumë raste të paprecedentë të lidhura me konfliktin dhe pretenduan kryerjen e krimeve të luftës nga Izraeli, Hamasi, Xhihadi Islamik Palestinez (PIJ) dhe grupe të tjera militante palestineze.”
Këto abuzime përfshijnë vrasjet, torturat, rrëmbimet dhe dhunën seksuale të kryera nga Hamasi, PIJ dhe të tjerët më 7 tetor, sipas raportit.
Ato përfshijnë gjithashtu “raporte për torturë sistematike dhe trajtim ose ndëshkim mizor, çnjerëzor dhe poshtërues të të burgosurve palestinezë në ambientet e burgjeve pas 7 tetorit”, dhe zhdukjen me forcë të mijëra palestinezëve nga Gaza.
Ndërsa raporti nuk përfaqëson konkluzionet e vetë qeverisë amerikane, Sekretari i Shtetit Antony Blinken tha në komentet e së hënës se “ne kemi procese brenda departamentit që po shikojnë ato incidente që janë ngritur,” raporton CNN.
“Këto procese janë në vazhdim”, tha ai. “Është e rëndësishme që ne të marrim kohë për të bërë më të mirën për të marrë faktet, për të marrë informacionin, për të bërë analizën. Është shumë sfiduese ta bësh këtë në kohë reale.”