Asociacioni i Gazetarëve të Kosovës (AGK) ka dënuar intimidimin publik të deputetit të VV-së, Dimal Bashës, ndaj gazetares së RTK-së, Blerta Foniqi-Kabashi.
AGK-ja përmes një njoftimi ka thënë se Lëvizja Vetëvendosje i ka dëshmuar në praktikë gjetjet shqetësuese të raportit të Reporterëve Pa Kufij, i cili e nxjerri Kosovën në pozicionin më të keq.
“AGK-ja dënon intimidimin publik të deputetit, Dimal Basha ndaj gazetares së RTK-së, Blerta Foniqi Kabashi. Në ditën kur raporti i Reporterëve Pa Kufij, e ka nxjerrë Kosovën në pozicionin më të keq në një dekadë sa i përket lirisë së medies, partia politike në pushtet, Lëvizja Vetëvendosje i ka dëshmuar në praktikë gjetjet shqetësuese të këtij raporti”, thuhet në njoftim e AGK-së.
Basha e ka krahasuar RTK-në me televizionin shtetëror serb, RTS, kur është pyetur nga gazetarja Foniqi – Kabashi për kushtin e Asociacionit për anëtarësim e Kosovës në Këshillin e Evropës.
“Për besë unë e shoh qysh e shoh secili shqiptar. Në RTS-in e Serbisë ata mujnë me pas shqetësim kryesor Asociacionin. Në RTK-në e Kosovës nuk duhet me kanë veç Asociacioni…A ta shpjegova që ka marrëveshje Kosova? Pse po e bën temë a duhet me ba Asociacionin a jo? Na e dimë çka është tema kryesore”, ka thënë Basha.
AGK-ja e ka përgëzuar gazetaren Foniqi – Kabashi për profesionalizmin e treguar në intervistën me deputetin Basha, përkundër sjelljes së papërshtatshme të deputetit.
Basha në këtë intervistë e ka sulmuar edhe Asociacionin e Gazetarëve të Kosovës për punën që e bën në mbrojtje të gazetarëve dhe të medieve.