Një grua bashkë me tre fëmijët e saj në Shkodër u raportuan si të zhdukur.
Policia e Shtetit thotë se në ujërat e lumit Buna u gjet trupi i vajzës, 9 vjeçare, e cila sipas Policisë dyshohet se është vetëmbytur si pasojë e dhunës nga babai i saj.
Policia thotë se 31-vjeçari, është arrestuar si i dyshuar për “shkaktim i vetëvrasjes”.
Përderisa, Policia e Shkodrës po vijon punën për gjetjen e tre të tjerë të cilët dyshohet se u larguan nga banesa e të dyshuarit më 02.05.2024 për shkakt të dhunës së ushtruar nga ai ndaj bashkëshortes dhe fëmijëve.
Gruaja e të dyshuarit, A.A është 39-vjeçare dhe fëmijët e tyre të mitur, 9, 8 dhe 3 vjeç.
Rastin në Polici e kishte raportuar vetë i dyshuari më 03.05.2024 se një ditë para, ishin larguar nga banesa, bashkëshortja e tij dhe 3 fëmijët e tyre të mitur.
“Bazuar në hetimet e kryera dhe inteligjenca policore, dyshohet se shkaku i largimit nga banesa ishte dhuna e ushtruar nga 31-vjeçari, ndaj bashkëshortes dhe fëmijëve, të cilët dyshohet se mund të kenë kryer vetëvrasje. Më datë 04.05.2024, u bë ndalimi i shtetasit E. A., 31 vjeç (i dënuar më parë për kultivim të bimëve narkotike), për veprën penale “Shkaktimi i vetëvrasjes”. Grupi hetimor ka vijuar hetimet dhe shërbimet e Policisë kanë vijuar kontrollet për gjetjen e 39-vjeçares dhe 3 fëmijëve. Gjatë kontrolleve, rreth orës 22:00 të datës 04.05.2024, në ujërat e lumit Buna, në fshatin Darragjat, u gjet trupi i pajetë i vajzës 9-vjeçare të shtetasve E. A. dhe A. A., e cila dyshohet se është vetëmbytur si pasojë e dhunës nga babai i saj” – thuhet në njoftimin e Policisë së Shtetit.