Kryetari i LDK-së, Lumir Abdixhiku së bashku me Sibel Halimin, tashmë drejtoreshë e Kulturës në Komunën e Prishtinës kanë vizituar sot kompozitorin e njohur, Florent Boshnjakun.
Në një postim në Facebook, Halimi ka thënë se është ndjenjë e mirë kur je e rrethuar me personalitete të tilla.
“Arti është shprehje e lirisë me vijë e ngjyrë, me zë e fjalë, por, në fillim ishin tingujt muzika, prandaj duhet të kujdesemi për të si për vet lirinë. Ndjenjë e mirë kur je e rrethuar me personalite si kompozitori Florent Boshnjaku”, ka shkruar Halimi në Facebook.
Halimi ka theksuar se Prishtina si kurrë më parë ka nevojë për rikthimin e imazhit të saj, si “vend i paqes e shumë ngjyrave, shumë zërave e tingujve, që mbajnë harmoninë e shpirtit të kryeqytetit”.
Edhe Abdixhiku ka lavdëruar punën dhe krijimtarinë e Boshnjakut, duke thënë se në studion e tij kanë bisedua gjatë për muzikën.
Në profilin e tij në “Facebook”, Abdixhiku ka shkruar se idetë që kompozitori i ka shprehur në këtë takim do të përfshihen në versionin e ri të programit “Rruga e Re”.
