Ish-ministrja e Punëve të Jashtme, Meliza Haradinaj – Stublla, ka thënë se dërgimi i letrës në KiE nga ministrja Donika Gërvalla në momentet e fundit, se Kosova po përgatit një draft të saj të Asociacionit për ta dërguar në Kushtetuese, është gabim kardinal.
Në një postim në Facebook, Haradinaj-Stublla ka thënë se me këtë veprim Kosova ka treguar “joseriozitet dhe se ka thelluar mosbesimin e shteteve aleate për bashkëveprim ndërkombëtar me Kosovën”.
Tutje, ajo ka thënë se Kosova me këtë veprim “i ka hapur rrugë kushtëzimit edhe më të rëndë të Kosovës nga Serbia”.
“Tregon joseriozitet në përcaktimin se Kosova nuk mund të defunksionalizohet me Asociacion; Thellon mosbesimin e shteteve aleate për bashkëveprim ndërkombëtar me Kosovën; I hap rrugë kushtëzimit edhe më të rëndë të Kosovës nga Serbia”, ka shkruar Haradinaj-Stublla.
Ministrja e Punëve të Jashtme, Donika Gërvalla, ka njoftuar se Qeveria e Kosovës është duke përgatitur një draftstatut për Asociacionin, të cilin pritet ta dërgojë për shqyrtim në Gjykatën Kushtetuese deri në fund të majit.
Kjo është bërë e ditur në një letër drejtuar presidentit të Asamblesë Parlamentare të Këshillit të Evropës, Theodoros Rousopoulos.
Ajo ka njoftuar se në Kushtetuese do ta çojnë një draftstatut të përgatitur nga vetë qeveria dhe jo draftin evropian.
Sipas letrës së Gërvallës, qeveria po punon në një draftstatut të inspiruar nga ai i Fondacionit Friedrich Ebert (FES).