Avokati Shkelzen Sopjani, njëherësh ish-inspektor i AKI-së, e ka quajtur “veprim jo të duhur” operacionin e Policisë së Kosovës në veri kundër institucioneve financiare serbe në Kosovë më 20 maj.
Sipas tij, edhe nëse ka qenë veprim i natyrës së shtrirjes së ligjshmërisë në veri të vendit, ky veprim është marrë në kohë të gabuar.
Në emisionin “FIVE”, Sopjani u shpreh se ky veprim prej strukturave ilegale serbe interpretohet te popullata lokale si “diçka që i cenon të drejtat e tyre”.
“Edhe nëse veprimi më i duhur merret në kohën e gabuar ka pasoja. Koha nuk është e duhur, për shkak të popullatës lokale, ata filluan me fitu besimin atje, si dikush që ju rri afër e i mbron, veprim i duhur këtë rast kishte me qenë nëse qeveria jonë do të aplikonte veprime të buta si avancimi i mirëqenies së qytetarëve në atë pjesë e jo të bëhet një veprim të tillë, edhe nëse nuk është realisht i asaj natyre, prej strukturave ilegale interpretohet si dicka që i cenon popullatën lokale”, ka deklaruar Sopjani.
Gjatë aksionit të së hënës, Policia e Kosovës i mbylli gjashtë objekte të Bankës Kursimore të Postës dhe Bankës Popullore të Serbisë në katër komunat me shumicë serbe në veri të Kosovës.
Sikurse Shtetet e Bashkuara të Amerikës, edhe Bashkimi Evropian e quajti këtë veprim të Qeverisë së Kosovës, veprim të pakoordinuar dhe përshkallëzues.