Agjencia për Informim dhe Privatësi ka ndaluar përpunimin e të dhënave personale përmes vëzhgimit me kamerë në Ministrinë e Shëndetësisë.
AIP-ja, përmes një postimi në Facebook, ka njoftuar se MSH-ja në cilësinë e kontrolluesit ka përpunuar të dhëna personale, përmes sistemit të vëzhgimit me kamerë, në kundërshtim me kriteret e Ligjit për Mbrojtjen e të Dhënave Personale.
‘’Me këtë rast, Agjencia ka nxjerr Vendim Nr. 116/2022, më date 06/06/2022, me të cilin ka obliguar Ministrinë të ndaloj përkohësisht përpunimin e të dhënave personale përmes sistemit të vëzhgimit me kamerë, si dhe të bëjë shkatërrimin e të dhënave të grumbulluara përmes këtij sistemi deri në datën e pranimit të vendimit. Poashtu, vëzhgimi me kamerë mund të filloj vetëm pas plotësimit të dispozitave ligjore të parapara me Ligjin për Mbrojtjen e të Dhënave Personale’’, është shkruar në njoftimin e AIP-së.
Gjithashtu thuhet se MSH-ja është e obliguar që brenda afatit prej tetë ditësh për të ndërmarrë të gjitha veprimet e duhura për zbatimin e vendimit dhe të njoftojë AIP-në.
Agjencia për Informim dhe Privatësi ka paralajmëruar se do të marrë masa ndëshkuese sipas Ligjit, nëse MSH-ja nuk zbaton vendimin.