Zëdhënësja e Lidhjes Demokratike të Kosovës (LDK), Sibel Halimi, ka thënë se Kosova nuk e ka luksin për t’u përçarë me Shqipërinë.
Përmes një postimi në Facebook, Halimi ka reaguar ndaj një fotoje ku e para e Kosovës, Presidentja Vjosa Osmani shihej e distancuar nga kryeministri i Shqipërisë, Edi Rama.
“Kosova nuk e ka luksin për t’u përçarë me Shqipërinë, si asnjë herë më parë në demokraci. Ne kemi nevojë për bashkëpunim të ndërsjellë dhe ndihmë reciproke”, ka shkruar Halimi.
Ndër të tjerash, ajo ka thënë se “Faktori politik në vend duhet të mendojë jo vetëm për strategji të posaçme për kultivimin e këtij bashkëpunimi, por edhe të detajeve, si prezantimi i përfaqësuesve të dyja vendeve, në paraqitje vizuale”, duke theksuar se shenja inatesh ndërpersonale janë mesazh i keq për Kosovën.
“Liderë me kurriz të kthyer nga njëri tjetri – kjo nuk duhet të jetë fotografia jonë!”, ka thënë Halimi.
Pas një debati të nxitur nga një fotografi gjatë takimit në Greqi në kuadër të Samitit SEECP, pretendohej se lidhjet Shqipëri-Kosovë ishin ftohur.
