Një proces i tillë ishte paraparë të ndodhte më 7 qershor në lagjen Ulpianë të Prishtinës, por jo vetëm.
Mirëpo, procesi i dezinsektimit i cili ka për qëllim eliminimin e insekteve të ndryshme të cilat fillojnë të shfaqen gjatë verës, nuk u implementua nga ana e Komunës së Prishtinës.
Por, luftimin e insekteve me anë të dezinsektimit të përgjithshëm, qytetarët po e shohin të domosdoshëm.
“Shumë e rëndësishme është, sepse me të vërtetë është e bezdisshme shumë sepse ato po futen brenda dhe dritaret po duhet që ti hapim për shkak të vapës, dhe ato po vërsulen brenda, e padurueshme”, është shprehur qytetari, Nebih Beqiri.
“Shumë është e rëndësishme dhe duhet bërë për shkkak të ambientit, për shkak të gjërave infektuese dhe normalisht çdo vit është bërë ndërsa tash nuk e di”, ka thënë qytetarja, Ajete Berisha.
E nga opozita akuzojnë pushtetin për përtaci.
Feim Osmani nga lëvizja Vetvendosje thotë se ky proces është dashur të fillojë para se të ketë reshje atmosferike, pasi ato favorizojnë shtimin e insekteve.
“Tri vitet e fundit ka pasur vite që ky provces ka filluar edhe me datën 15 maj mirëpo cdo herë deri me 1 qershor faza e parë ka përfunduar, këtë vit ku sot është data 8 qershor nuk ka filluar ende. Pikërisht kur ka lagështi më shumë duhet intervenuar më shpejte sepse është mot që e favorizon shtimin e mushkonjave”, është shprehur Feim Osmani nga Lëvizja Vetvendosje.
E nga Komuna e Prishtinës thonë dezinsektimi ishte paraparë të fillonte me 6 qershor.
Mirëpo shkaku i lagështisë dhe reshjeve atmosferike, ky proces është shtyrë për 13 qershor.
“Meqenëse, Prishtina aktualisht është në shkallë të lartë të lagështisë ajrore në datat e planifikuara për dezinsektimin hapësinor në territorin e Kryeqytetit, i kemi njoftuar qytetarët se dezinsektimi hapësinor shtyhet për datën 13 qershor 2022”, thuhet nga komuna e Prishtinës.
Përpos dezinsektimit, në plan ka qenë edhe procesi i larvizimit, proces ky i cili sipas Komunës është përfunduar në afatin e caktuar.
Komuna e Prishtinës çdo vit, para fillimit të stinës së verës bën dezinsektimin e lagjeve dhe fshatrave të kryeqytetit.
