Një stuhi me reshje shiu ka përfshirë disa qytete të Kosovës pasditen e kësaj të marte.
“Meteo Ballkan” ka publikuar pamje nga reshjet e shiut nga disa qytete dhe fshatra të ndryshme.
Aktualisht erëra të forta ka edhe në kryeqytetin e Kosovës, Prishtinë.
Dëme materiale në lagjen “Pejton” janë shkaktuar si pasojë e stuhisë.
Në parkingun e njërit nga komplekset banesore, janë dëmtuar tri vetura si pasojë e rënies së çatisë.
Të lënduar nuk ka ndërsa pjesët e çatisë janë larguar.
Ndërsa, në Skenderaj, gjatë kësaj dite, pas reshjeve të mëdha të shiut ka rënë fasada e një ndërtese.
Bie fasada e një ndërtese në Skenderaj si pasojë e motit të keq
Sokol Hoxha, shef i Sektorit për Mbrojtje dhe Shpëtim në Komunën e Skenderajit, ka deklaruar se ka dëme minimale materiale.
Po ashtu, Instituti Hidrometeorologjik i Kosovës (IHMK) ka bërë thirrje të shmangen shëtitjet ose punët në natyrë dhe kaosi në komunikacion, pasi gjatë së martës pritet të ketë stuhi dhe rrufe.
“Të nderuar, situata e përgjithshme Hidrometeorologjike ditëve të fundit është jo stabile, si pasojë e reshjeve të shiut të përcjella me stuhi lokale me breshër dhe erëra të forta, duke shkaktuar edhe vërshime të shpejta sidomos të disa rrjedhave ujore me karakter malorë (rrëke, përrocka etj)”, ka njoftuar IHMK-ja.