Pas homazheve të mbajtura në Teatrin e Operas dhe Baletit, ku morën pjesë familjarë, miq, dashamirë e figura të larta shtetërore të vendit, Kosovës dhe Maqedonisë së Veriut, të botës së artit e letërsisë, Kadare është përcjellë nga kortezhi për në varrezat e Tufinës.
Kryetari i PDK-së, Memli Krasniqi, përmes një postimi në “Facebook”, ka njoftuar se në Ambasadën e Republikës së Shqipërisë në Kosovë, në emrin e tij dhe të Partisë Demokratike të Kosovës, ka shprehur ngushëllimet më të thella për ndarjen nga jeta të kolosit të letërsisë shqipe, Ismail Kadare.
Krasniqi shkruan se vdekja e Kadaresë është një humbje e madhe për të gjithë popullin shqiptar dhe lexuesit.
“Vdekja e Kadaresë është një humbje e madhe, jo vetëm për familjen, shtetin e popullit shqiptar, por edhe për lexuesit kudo në botë, të cilët takimin e parë me shkrimtarin dhe intelektualin ikonë të kombit tonë e patën në rreshtat e dhjetëra veprave të tij.”
Teksa shton se kujtimi për Kadarenë do të jetë i përjetshëm, njëjtë si krijimtaria e tij.
“Pena, imagjinata dhe krijimtaria e Ismail Kadaresë na frymëzoi e na edukoi ndër breza. Ai u bë shkrimtari protagonist i letërsisë, qytetërimit dhe mendimit shqiptar, duke e popullarizuar letërsinë shqipe dhe historinë e kulturën e Shqipërisë dhe shqiptarëve në përmasa evropiane dhe botërore. Kujtimi për fanarin e letërsisë tonë kombëtare do të jetë i përhershëm, ashtu si krijimtaria e tij, sepse në raftet e librave të secilës shtëpi ku flitet shqip, gjithmonë do të jetë së paku një libër i Kadaresë.”
“Pusho i qetë ISMAIL KADARE – ti Gjeneral i letrave shqipe!”
