Gjykata Speciale ka njoftuar se të hënën më 8 korrik përpara seancës, sigurimi i Dhomave të Specializuara i kishte kërkuar Jakup Krasniqit që ta hiqte kravatën dhe se të njëjtit kanë kërkuar sqarime nga shefi i Oficerëve të Qendrës së Ndalimit rreth asaj nëse kollarja hyn te veshjet që ndalohet nga rregullat e ndalimit.
Specialja, në një përgjigje për Expressin, ka treguar se shefi i paraburgimit i ka konfirmuar se kollarja është e lejuar dhe pasdite ia kanë kthyer Krasniqit.
“Para seancës së djeshme, sigurimi i Speciales i kërkoi Krasniqit ta hiqte kollaren, duke kërkuar sqarime nga shefi i paraburgimit nëse rregullat e paraburgimit që ndalojnë veshje të caktuara do të zbatoheshin në këtë rast. Krasniqit i është kthyer kollarja dje pasdite dhe shefi i paraburgimit ka konfirmuar se bartja e kollares është e lejuar”, thuhet në përgjigjen e tyre.
Sot, ministrja e Drejtësisë, Albulena Haxhiu, ka kërkuar nga kryetarja e Dhomave të Specializuara të Kosovës, Ekaterina Trendafilova, që të marrë veprime për të adresuar rastin.
Në një letër drejtuar Trendafilovës, Haxhiu e ka cilësuar akt absurd kërkesën për heqjen e kollares.
Kollarja me shqiponje i hiqet Jakup Krasniqit para se të nisë seanca