Presidenca e Kosovës ka akuzuar autoritetet e Maqedonisë së Veriut për shkelje të praktikave ndërkombëtare dhe Konventën e Vjenës për Marrëdhënie Diplomatike, kjo pasi të enjten presidentes Vjosa Osmani është tentuar t’i merret telefoni personal nga një pjesëtar i sigurimit të Aeroportit të Shkupit (TAV).
“Presidentja nuk ka lejuar një gjë të tillë, sepse do të ishte shkelje e rëndë”, thuhet nga ana e Presidencës.
Duke mos i respektuar rregullat, sipas Presidencës së Kosovës, pala maqedonase e kishte marrë çantën personale të dorës së presidentes Osmani. Por, dorëzimi i telefonit personal nuk është pranuar nga ajo.
Nga kompania TAV thanë se departamenti i sigurisë, në kuadër të përgjegjësive, ka kryer kontroll standard të sigurisë.
Kjo sjellje e zyrtarit maqedonas të aeroportit është në kundërshtim me çdo praktikë ndërkombëtare, sipas të cilave kur krerët e shtetit udhëtojnë, ata mbrohen me privilegje e imunitete diplomatike. Në kundërshtim me këto rregulla, pala maqedonase ka marrë çantën personale të dorës së presidentes. Edhe pse kjo ishte kundër rregullave, ekipi i presidentes e ka lejuar në mënyrë që presidentja të hyjë në aeroport, konkretisht në sallën VIP, e cila ishte rezervuar me notë verbale të Ambasadës sonë, siç është praktika për udhëtimet e krerëve të shtetit. Mirëpo, për arsye të sigurisë, në asnjë mënyrë nuk është lejuar që të dorëzohet telefoni personal”, thuhet në përgjigjen për Dukagjinin.
Kjo sjellje e cila është cilësuar e dhunshme nga zyrtari i Aerpoportit të Shkupit, sipas institucionit të Presidencës së Kosovës, nuk ka ndodhur asnjëherë në asnjë udhëtim në botë, duke përfshirë edhe në shtete mosnjohëse.
Lidhur me këtë incident, Ministria e Punëve të Jashtme dhe Diasporës ka njoftuar se ka nisur mbledhjen e informacioneve dhe ka kërkuar sqarime zyrtare nga autoritetet maqedonase për incidentin ndaj presidentes Vjosa Osmani në Aeroportin e Shkupit.
MPJD kërkon sqarime për incidentin ndaj presidentes Osmani në Shkup
Ndërsa, MPB e Maqedonisë së Veriut ka dhënë versionin e saj lidhur me incidentin në Aeroportin e Shkupit, ku sigurimi i presidentes së Kosovës, Vjosa Osmani, u përplas me punonjësit e aeroportit për kontrollin e telefonit dhe çantës së dorës.
MPB e Maqedonisë së Veriut e pranon se ia kërkuan telefonin presidentes Osmani