Të mërkurën është nënshkruar marrëveshje mirëkuptimi ndërmjet tri institucioneve të vendit, Agjencisë së Statistikave të Kosovës (ASK), Ministrisë së Financave dhe Bankës Qendrore të Kosovës (BQK).
Në njoftimin e ASK-së thuhet se qëllimi i kësaj Marrëveshjeje Mirëkuptimi (MeM) ndërmjet tri institucioneve është bashkëpunimi institucional dhe përgjegjësitë e tri institucioneve nënshkruese në fushën e statistikave makroekonomike dhe financiare.
“Agjencia e Statistikave të Kosovës (ASK) sot ka nënshkruar një Marrëveshje Mirëkuptimi me Bankën Qendrore të Kosovës (BQK) dhe Ministrinë e Financave, Punës dhe Transfereve (MFPT). Nënshkrimi i Marrëveshjes së Mirëkuptimit është bërë në ambientet e ASK-së nga z. Avni Kastrati (U.d. Kryeshef Ekzekutiv i ASK-së), z. Hekuran Murati (Ministër i MFPT-së) dhe z. Ahmet Ismajli (Guvernator i BQK-së). Qëllimi i kësaj Marrëveshjeje Mirëkuptimi (MeM) ndërmjet tri institucioneve përpiluese të statistikave zyrtare në Republikën e Kosovës, Agjencisë së Statistikave të Kosovës (ASK), si prodhuesi kryesor i zyrtar i statistikave në vend, Bankës Qendrore të Republikës së Kosovës (BQK), si dhe Ministrisë së Financave, Punës dhe Transfereve (MFPT)/Thesari i Kosovës, është bashkëpunimi institucional dhe përcakton rolet dhe përgjegjësitë e tri institucioneve nënshkruese në fushën e statistikave makroekonomike dhe financiare”, thuhet në njoftim.
Tutje thuhet se kjo marrëveshje është e rregulluar sipas ligjeve kombëtare, “duke zbatuar standardet e parashikuara në aktet ligjore të BE-së, si dhe në Programet Zyrtare Vjetore për Sistemin Kombëtar Statistikor”.
Avni Kastrati nga ASK ka theksuar rëndësinë e këtij bashkëpunimi ndërinstitucional për t’i përmbushur udhëzimet statistikore ndërkombëtare për cilësinë e të dhënave, siç përshkruhen në Marrëveshjen e Mirëkuptimit të tri institucioneve ASK-MFPT-BQK.
Në anën tjetër, Guvernatori i BQK-së, Ismaili ka thënë se “kjo Marrëveshje formalisht e shënon një koordinim ndërinstitucional të të tri institucioneve prodhuese të statistikave për avancimin e sistemit statistikor të Kosovës nga Sistemi i Përgjithshëm i Shpërndarjes së të Dhënave (GDDS) në Standardin e Veçantë të Shpërndarjes së të Dhënave (SDDS), si një standard më i avancuar, i cili promovon përmirësimin e kualitetit, transparencës dhe disponueshmërisë së informatave statistikore”.
Ndërkaq, ministri Murati tha se “kjo Marrëveshjeje është edhe një hap drejt standardizimit dhe krahasimit ndërmjet platformave, si dhe ndërlidhja e këtyre platformave, duke evituar kështu edhe çështjen e privatësisë së të dhënave”.
“Po ashtu, nënshkrimi i kësaj Marrëveshjeje përbën një hap të rëndësishëm në përmbushjen e zotimeve të vendit ndaj rekomandimeve të Fondit Monetar Ndërkombëtar (FMN) për avancimin e mëtejshëm të përpilimit dhe raportimit statistikor, të diskutuara dhe të dakorduara në takimet pranverore të FMN-së në Washingron D.C. ASK-ja mbetet e përkushtuar në arritjen e standardeve më të larta të përpilimit dhe raportimit të të dhënave statistikore”, thuhet tutje në njoftim.